Sé on espésialité on boulanjé Kapestè-Marigalant é madanm a'y ka fè.
Sa pa étonan donk si Met Confiant, on matniken, magré tou sa i konnèt, é tou sa péyi i ja alé, pa té pé volé à sèkou a Marie-José...
Sé kon mwen, an pa alé a Aten épi Laura, kifè an pa té ka chonjé lé Grek té ka mété divin adan barik an rézin a bwa d'pen, é sa ka ba'w on divin yo ka kriyé Retsina, ki ni on goud'sev a piébwa la sa.Ou pé achté "Kaka-Bœuf©" a'w tou cho tou cho avan'w pran bato-la pou kité Marigalant rantré laPwent. Chak bel "Kaka-Bœuf©" la ni konkidiré koulè a on kaka bef ki preskè sec, on fom a pen-o-rézen, mé pli lou, pli mastif, épi sé sek konsantrik-la ka rimonté, ou ka vwè ?
Misié-la é madanm-la ka mété bon siwo batri adan pat a kalité gato la sa, é touskisanfo silon sèkrè a yo, avan yo météofou... Sé sa ka ba'w bel koulè-la é ti gou espésial-la. Apa pou di ou pé-é pé fè'y akaz a'w, mé fo'w konprann pou lè moman sé on sel fanmi boulanjé anba-la ka fè "KakaBœuf©" otantik-la. Woulo pou sé moun-la sa !
Pourtefinirsa, fok an di'w sé dé gran moun ki vréman janti, an alé-la on sel fwa ja ni kek lanné, on zanmi Marigalant té di mwen fo pa an pati san konnet "Kaka-Bœuf©"..., é nou fè mannev nou alé vitman pou nou paté sa raté bato-la, é an pé-é jen oublié ti moman-la sa, lè'w kalé an boutik-la pran pwovision "Kaka-Bœuf©" a'w sé moun-la ka kontan vwè'w, é yo ka voplé sé bel papa jwayo sikré-la ba'w adan dé saché maké "Kaka-Bœuf©" épi non a yo, tou pannan yo ka ba'w dé ti pawol pou'w kontan'w vini é yo ka rann ou la monné.
Sa ki pa toujou lè ka épi sé akèy a sé komersan annou-la aprézan-la...
An ka swété Marie-José é Met Confiant alé on jou Marigalant é pran "Kaka-Bœuf©"-la tou cho an men a sé moun-la.
Sa diféran, é sa ka santi bon.
JS