8 - Èstòkòlm dé mé démilkat ...

Partage entre internautes
Répondre
Potomitan
Moderator
Moderator
Messages : 200
Inscription : vendredi 09 juillet 2004 16:18
Contact :

8 - Èstòkòlm dé mé démilkat ...

Message par Potomitan »

Èstòkòlm dé mé démilkat

Wè! Rafayèl! Dè Syèd, an pani mo an pon lang ankò pou di-w mèsi pou lotorizasyon ofisyèl dè palé kréyòl é dè montré nou ki sé dèyè kréyòl kini kréyòl. Ou an diksyonnè é ou ka ékri diksyonnè. Ka lè pèp´ vlé ankò? Pen é chis? Ou ka kontinyé drésé lalwèt an nou. An ja di-w an kon pan. Sé konyéla pap´la kay béni nou an kréyòl. Apa laten ankò hon, sé kréyòl. Amènn´. Ola lé zansyen pou vwè nou ka bay gaz an kréyòl souplè? Nou sav sa pa fasil ba-w Rafayèl, pas´maraj-la solid mé nou la kon le a la é zékal a-w solid kon ta mòlòkòy. Péta paka é péké fann-li. Yenki sa, répétésa. BonDyé bon!

Pou kont an mwen, ou ja sav ki sèl rèv an mwen sété dè makyé kréyòl kon an ka fè-la la onfwa menm. Ki moun ki té`é di ki téké tini on Kapès Kréyòl jòdi-la? Apa jé hon? Kyèk fwa, an ka kalkilé ki an pasé tout´vi an mwen ka fè dé biten: konèt mwen-menm é apwann makyé kréyòl ki paté ka ékri é ankò, sété défann... wè! Listwa-la ja ékri. Sé pou di-w Rafayèl ki ou ja koupé, haché é raché anpil, on pakyèt, on pwélé, onchaj, on tilili, onkounan, on wélélé razyé é wouvè bon chimen ban nou... san sab. Apakouyonnadéri hon! Hmm!

Dépi tan-la an ka apiyé tousèl linivèsité "Trifouyi", Lèspwi Kréyòl an mwen oblijé pli gran ki ta gran grèk, alòspoudonk, ou ka toukonpwann ki sé konyéla an kay apwann kréyòl-matiniké arékaba èvè diksyonnè a-w é anvérité, li diksyonnè sé biten an mwen. Oupédisa! Mèt lékòl an mwen sé liv é dabò diksyonnè. Sé la Lèspwi-la ka pwan fré ay. Dayè sé èvè ta laband a Raf Lidwig, Danyèl Monbwan, Èktò Poulé é Silvyann´Tèlchid, mwen apwann maké kréyòl Gwadloup kon an ka fè-la la: on liv jònn kon lò ki a kaz an mwen toujou anba bwa an mwen.

On kado mayé dépi onzan. An paka pété san-y. Bèl pawòl kréyòl ka méné bèl pawòl kréyòl Rafayèl. Avan an fini lèt-lasa, apapoudi sa ka gadé lézòt mé an vlé vou é tout´moun sav an bon kréyòl siouplé, ki sé vou é Jéra Loryèt ki mèt a mannyòk kréyòl an mwen: sé zót ki ba Lèspwi Kréyòl Plenfòs an mwen tòl, plimaj, fizik é fóm. Yenkisa, répétésa.

Li-w an tout´lang Rafayèl, sé li makyé a bonDyé kardèdi li-w ka fè mwen ay an tout´ fon é fenfon a sa an té vlé makyé mé pa té ka nòz makyé. Alèkilé gras a-w, menm si an pè di, an pa ka voyé di. An pasa ékri sa moun vlé an makyé mé an ka makyé kanmenm. Sésa! Pòtalans-la sé ki sa ka ba Lèspwi-la chanjmandè é lè-Y an chanjmandè sé pa katakata hon, sé kamipla. Lanbéli!

Tousa pou di-w ki an panni é péké jan ni pon gran banda dè montré-w angnen pas ou toujou sav sa-w ka fè é lè-w on-ti-jan pa sav, bonDyé andèrdan a-w sav, padavwa sé lè-w on-tijan pa sav ki ou KA SAV. Sé sikré a mèt a mannyòk (zyédou). OU SAV SA. É piskè ou mandé lè répondè mi mwen. Yenki-la OWA-W! BonDyé bon! Kon di-w menm "Chak flè ka flé ri an tan ay." An paka maporité angnen.

Dapwé sa an li, an ja konpwann ki ou ka travay "Le premier dictionnaire du créole martiniquais" lè-w pé alò ou pòkò mété akokodo anlè-y. Pli bèl pawòl kréyòl an mwen sé: " Èvè pasyans ou ka vwè lonbwik a on pis." Kifè an ka kontinyé li é pliché atètipo tout nich-twèl aw é an ké wouba-w fré... an kréyòl souplè, siplètaDyé andidan an nou, davwa... sé-nou-menm-ki-la anlè sibèrlèspas´!

Mési Rafayèl dè fenfon a kyè an nou, Malté é mwen! Nou doubout gras a Dyé pannan drapo kréyòl-la ka hosé... an po a moun.

Lonnè é rèspé ba-w!

Maksèt Oulsònn
Dernière modification par Potomitan le jeudi 22 juillet 2004 20:15, modifié 1 fois.
Potomitan
Moderator
Moderator
Messages : 200
Inscription : vendredi 09 juillet 2004 16:18
Contact :

8

Message par Potomitan »

Magré ka fè fwet bon fwet atè Estokolm, ou pa ka bliyé lang kréyol an nou la. Sa ka fè mwen onpil plézi ! Fok tout moun asi latè savé kè tini on bel gran lang yo ka kriyé kréyol.

Kenbé red !

Raphaël
Répondre