Nwèl lafyant
Nwèl lafyant
Pou yon pèp k ap trimen anba tant
Nan respire tout move sant
Nwèl lafyant
Pou tout papa ki nan toumant
Ki pa kap bay pitit yon mant
Nwèl lafyant
Pou tout manman ki gen doulè nan vant
Akoz yo trennen twòp sou jant
Nwèl lafyant
Pou yon kolòn jenn matant
Ki pa kap mete pèmanant
Nwèl lafyant
Pou tout ti bòs chapant
Ki refijye nan vye mazi plen fant
Nwèl lafyant
Pou tout raketè san patant
Ki met Ayiti alavant
Nwèl lafyant
Pou tout moun ki pran tanjant
Olye yo chache yon antant
Pa tann de mil senkant
Pou peyi a al sou pant
Ak yon bon beny Sous Pyant
Nwèl ap sispan lafyant
Miguel Dumay
Desanm 2010